អំពី​គេហទំព័រ

ឥឡូវ​នេះ​មនុស្ស​ទាំង​អស់​កំពុង​តែ​រស់​នៅ​ក្នុង​សម័យ​បច្ចេកវិទ្យា​ ទំនើប​មួយ​ដែល​បង្ក​ភាព​ងាយ​ស្រួល​កាន់​តែ​ច្រើន​ជាង​មុនៗ​ទៅ​ទៀត។ ទាំង​ការ​រចនា, ការ​គូរ​ប្លង់, ការ​បោះពុម្ព, ការ​រក្សា​ទុក​ឯកសារ និង​ការ​ងារ​ជា​ច្រើន​ទៀត។ ការ​បោះពុម្ព​ជា​ផ្នែក​មួយ​នៃ​បច្ចេកវិទ្យា​ទំនើប​សម័យ​នេះ​ដែរ ព្រោះ​គេ​អាច​បោះពុម្ព​ផ្ទាំង​បដា​ធំៗ​រាប់​សិប​ម៉ែត្រ​ការេ ឬ បោះពុម្ព​សៀវភៅ​ផ្សព្វផ្សាយ ឬ​ក៏ បោះពុម្ព​ខិតប័ណ្ណ​រាប់​ពាន់​សន្លឹក​ដោយ​មិន​ចំណាយ​ពេល​យូរ​នោះ​ឡើយ។ ការ​បោះពុម្ព​ទាំង​នោះ​ចាំ​បាច់​ត្រូវ​ការ​ប្រើ​ពុម្ព​អក្សរ​ក្នុង​ការរចនា​ និង​សរសេរ។ ហើយ​ការ​បោះពុម្ព​បែប​ទាំង​នោះ​បាន​ប្រើ​ប្រាស់​អក្សរ​ផ្សេងៗ​ទៅ​តាម​ចិត្ត​អ្នក​រចនា ប៉ុន្តែ​បច្ចុប្បន្ន​នេះ​ការ​ប្រើ​អក្សរ​យូនីកូដ​ខ្មែរ​បាន​និង​កំពុង​រីក​ចម្រើន​ឡើង​ក្នុង​ផ្នែក​រចនា។

អក្សរ​យូនីកូដ​ខ្មែរ​ដែល​ត្រូវ​បាន​ចាប់​បដិសន្ធិ​​ឡើង​នៅ​ខែ​កញ្ញា ឆ្នាំ​១៩៩៩ (ចាប់​ពី​ពេល​ប្រព័ន្ធ​អក្សរ Unicode កំណែ​ទី៣ បាន​ចេញ​ផ្សាយ) ហើយ​បាន​លេច​រូបរាង​ពេញ​លេញ​នៅ​ឆ្នាំ២០០៤។ បច្ចុប្បន្ន​នេះ​អក្សរ​យូនីកូដ​ខ្មែរ​ត្រូវ​បាន​គេ​ដំឡើង​ប្រើ​ទាំង​នៅ​ក្នុង​កុំព្យូទ័រ​និង​ទូរស័ព្ទ។ ចាប់​ពី​ឆ្នាំ២០០៤​មកដល់​បច្ចុប្បន្ន​នេះ ការ​បង្កើត​ពុម្ព​អក្សរ​ខ្មែរ​ត្រូវ​បាន​ប្រព្រឹត្តិ​ទៅ​គួរ​សម ហើយ​អ្នក​បង្កើត​ពុម្ព​អក្សរ​ក៏​មាន​ច្រើន​ដែរ។

ដោយ​សារ​ខ្ញុំ​មើល​ឃើញ​អំពី​ការ​ខិតខំ​បង្កើត​ពុម្ព​អក្សរ​ខ្មែរ​ឡើង​ដោយ​បង​ប្អូន​ជាតិ​ខ្មែរ​យើង​នានា ទើប​ខ្ញុំ​បាន​ចាប់​ផ្ដើម​គេហទំព័រ​នេះ​ឡើង​ដើម្បី​ផ្ដល់​ភាព​ងាយ​ស្រួល​ដល់ អ្នក​រចនា, អ្នក​បោះពុម្ព, អ្នក​ធ្វើ​ការ​រដ្ឋបាល និង​អ្នក​ប្រើ​ប្រាស់​ធម្មតា​ទៀត អាច​ស្វែង​រក​ពុម្ព​អក្សរ​ខ្មែរ​ទៅ​ប្រើ​យ៉ាង​ងាយ​ស្រួល ព្រម​ទាំង​ឆាប់​រហ័ស​ផង​ដែរ។ ម្យ៉ាង​វិញ​ទៀត​លោក​អ្នក​ក៏​អាច​ធ្វើ​ការ​ទាញ​យក​ពុម្ព​អក្សរ​ជា​កញ្ចប់ (ប្រមូល​ផ្ដុំ​រួម​គ្នា) ដែល​ខ្ញុំ​ប្រមូល​ផ្ដុំ​វា​ជា​រៀង​រាល់​ខែ (បើ​សិន​មាន​ពុម្ព​អក្សរ​ថ្មីៗ)។

រាល់​ពុម្ព​អក្សរ ដែល​ផ្សាយ​នៅ​ក្នុង​គេហទំព័រ​នេះ​សុទ្ធ​សឹង​តែ​ត្រូវ​បាន​រក្សា​សិទ្ធិ​ដោយ​ម្ចាស់​ដើម។

គេហទំព័រ​នេះ​ត្រូវ​បាន​បង្កើត​ឡើង​ដោយ​ខ្ញុំ​បាទ ទេព សុវិចិត្រ, ក្នុង​គោល​បំណង​បម្រើ​ប្រយោជន៍​សង្គម ដោយ​មិន​គិត​ប្រាក់​កម្រៃ​ពី​អ្នក​ចូល​ទស្សនា​ឡើយ ហើយ​ត្រូវ​បាន​ដាក់​សម្ពោធ​ជា​សាធារណៈ​នៅ​ថ្ងៃ​ទី... ខែ​កក្កដា ឆ្នាំ​២០១២ វេលា​ម៉ោង ..... ។