IT4U | បច្ចេកព័ត៌មានវិទ្យាសម្រាប់អ្នក

ឯកសារបន្តិចបន្តួចអំពីការបង្កើតពុម្ពអក្សរយូនីកូដខ្មែរ

ទេព សុវិចិត្រ — Fri, 17 May 2013 15:24:31 +0000

នេះជាអត្ថបទបទបង្ហាញមួយដែលខ្ញុំធ្លាប់លើកយកទៅបង្ហាញនៅក្នុងកម្មវិធីព្រឹត្តិការណ៍បើកទូលាយ (រៀបចំដោយក្រុម ចែកគ្នានិយាយអាយធី) លើកទី១ ស្ថិតនៅសាកលវិទ្យាល័យហ្សាម៉ាន់។

វាពុំមានអ្វីលម្អិតនោះឡើយ ព្រោះខ្ញុំរៀបចំវាជាចំណុចខ្លីៗ។ កាលនោះក៏ពុំបានថតជាសំឡេងឬវីដេអូអ្វីទុកដែរ ព្រោះពុំបានរៀបចំ។ ខ្ញុំចង់ចំណាយពេលដើម្បីធ្វើអ្វីជាច្រើន ក៏ប៉ុន្តែដោយសារពេលវេលាមិនសូវមាន ដូច្នេះជាផលលំបាកសម្រាប់ខ្ញុំ។

ប្រសិនបើមានចម្ងល់អ្វីអំពីការបង្កើតពុម្ពអក្សរយូនីកូដខ្មែរ អាចដាក់មតិនៅក្រោមអត្ថបទនេះ ខ្ញុំនឹងព្យាយាមឆ្លើយតបតាមតែអាចធ្វើទៅបាន។

ផែនទី Google ថ្មី

ទេព សុវិចិត្រ — Fri, 17 May 2013 14:38:09 +0000

នៅក្នុងព្រឹត្តិការណ៍ Google I/O ជារៀងរាល់ឆ្នាំ ក្រុមហ៊ុន Google តែងតែផ្សព្វផ្សាយនិងបង្ហាញពីអ្វីដែលថ្មីៗទាក់ទងទៅនឹងផលិតផលរបស់ខ្លួនដែលកំពុងអភិវឌ្ឍ។ នៅក្នុងឆ្នាំនេះផងដែរ ផែនទី Google ត្រូវបានដាក់ប្រកាសជាផ្លូវការអំពីការរចនាទ្រង់ទ្រាយថ្មី និងលក្ខណៈពិសេសថ្មីៗជាច្រើនទៀតដែលពិតជាប្លែកនិងមានភាពប្រសើរជាងមុនទៅទៀត។

ការរចនាទ្រង់ទ្រាយថ្មី

ផ្ដល់នូវភាពទាក់ទាញជាងមុន ព្រមទាំងការបង្ហាញលទ្ធផលកាន់តែល្អជាងមុន ហើយការស្វែងរកក៏កាន់តែងាយស្រួលជាងមុនថែមទៀត ម្យ៉ាងវិញទៀតនោះ ផែនទីមានទំហំពេញអេក្រង់កុំព្យូទ័រ។

កាតព័ត៌មាន (Info Card)

នៅពេលដែលអ្នកចុចលើចំណុចទីកន្លែងណាមួយ នោះកាតព័ត៌មានដែលបង្ហាញលម្អិតអំពីទីកន្លែងនោះនឹងលេចឡើងនៅពីក្រោមប្រអប់ស្វែងរក។

លក្ខណៈថ្មីៗដទៃទៀត

នៅពេលដែលអ្នកចុចទីតាំងណាមួយនៅលើផែនទី នោះកាតព័ត៌មាននឹងបង្ហាញនៅខាងក្រោមប្រអប់ស្វែងរក ដែលក្នុងនោះមានបង្ហាញឈ្មោះទីតាំងកន្លែងនោះ, ភ្ជាប់ទិសដៅ ឬក៏ចូលទៅកាន់ Street View ។

Earth View ជាលក្ខណៈពិសេសថ្មីមួយបន្ថែមទៀត ដែលត្រូវបានអភិវឌ្ឍកាន់តែប្រសើរនៅក្នុងផែនទី Google ។ Earth View គឺជាការបង្ហាញដោយប្រើប្រាស់បច្ចេកវិទ្យា 3D ដូច្នេះរូបភាពទាំងឡាយក្នុងនោះនឹងត្រូវបានបង្ហាញលម្អិតល្អ។

តើអ្នកចង់ប្រើផែនទី Google ថ្មីនេះដែរឬទេ?

សូមចូលទៅកាន់ http://maps.google.com/help/maps/helloworld/desktop/preview/ ដើម្បីដាក់សំណើទៅកាន់ Google ។

វីដេអូព័ត៌មានអំពីផែនទី Google ថ្មី

ពុម្ពអក្សរខ្មែរឈ្មោះ «បឹង»

ទេព សុវិចិត្រ — Mon, 13 May 2013 08:24:50 +0000

នេះគឺជាពុម្ពអក្សរខ្មែរថ្មីមួយដែលខ្ញុំទើបនឹងធ្វើរួចក្នុងពេលថ្មីៗនេះ។ ពុម្ពអក្សរនេះជាប្រភេទយូនីកូដ ដែលមានឈ្មោះថា «បឹង» ហើយមានបញ្ចូលអក្សរអង់គ្លេសជាស្រេច។ អក្សរអង់គ្លេសដែលមានក្នុងពុម្ពអក្សរនេះមានឈ្មោះថា Didact Gothic រចនាដោយលោក Daniel Johnson ដែលមានដាក់ឲ្យប្រើនៅក្នុង Google Fonts ក្រោមអាជ្ញាបណ្ណ OFL (Open Font License) ។

ទាញយក (Google Drive) ទាញយក (Dropbox)

ប្រសិនបើអ្នកបានប្រើទៅ ហើយជួបប្រទះនឹងបញ្ហាណាមួយ សូមមេត្តារាយការណ៍មកកាន់ខ្ញុំវិញ។ អរគុណ!

ពុម្ពអក្សរខ្មែរ «បឹង» ស្ថិតនៅក្រោមអាជ្ញាបណ្ណ OFL

Ubuntu 13.04 ដាក់ឲ្យទាញយកហើយ

ទេព សុវិចិត្រ — Thu, 02 May 2013 11:32:32 +0000

ប្រហែលជាអ្នកទាំងអស់គ្នាបានដឹងរួចមកហើយថា Ubuntu តែងតែអភិវឌ្ឍជំនាន់ថ្មីៗនៃប្រព័ន្ធប្រត្តិការរបស់ខ្លួននិងចេញឲ្យប្រើជាផ្លូវការក្នុងមួយឆ្នាំ២ដង គឺនៅខែមេសា និងខែតុលា។ កាលពីសប្ដាហ៍មុននេះ Ubuntu បានដាក់ចេញជំនាន់ថ្មីរបស់ខ្លួនគឺ 13.04 ដែលភ្ជាប់មកជាមួយមុខងារថ្មីៗនិងការកែសម្រួលមួយចំនួនធំទៀត។

បម្លាស់ប្ដូរនៅក្នុងជំនាន់ 13.04 ៖

Unity Desktop លឿនជាងមុន
ផ្ទាំង Social Lens ថ្មី
ម៉ឺនុយ Sync ថ្មី
បានបន្ទាន់សម័យលើកម្មវិធីដែលភ្ជាប់មកជាមួយ (LibreOffice, កម្មវិធីគ្រប់គ្រងឯកសារ …)
Linux Kernel 3.8.8

[OMG! Ubuntu]

ប្រសិនបើអ្នកចុចទស្សនាវីដេអូខាងក្រោមនេះ អ្នកនឹងបានឃើញអំពីការផ្លាស់ប្ដូរផ្សេងៗទៀត ដែលត្រូវបានដាក់បញ្ចូលនៅក្នុង Ubuntu 13.04 ដែលទើបតែចេញនាពេលថ្មីៗនេះ។

ប្រសិនបើអ្នកបានដំណើរ Ubuntu 13.04 រួចរាល់ហើយ សូមចំណាយពេលអានអត្ថបទមួយនេះដែរ ដើម្បីទទួលបានការណែនាំខ្លះៗក្នុងការរៀបចំ Ubuntu 13.04 ក្រោយពេលដំឡើងរួច។ [ចុចទីនេះ]

រួមគ្នាជួយឲ្យ Google Translate ភាសាខ្មែរប្រសើរឡើង

ទេព សុវិចិត្រ — Fri, 19 Apr 2013 05:44:18 +0000

ដោយសារតែ Google ទើបចេញកំណែ Alpha ដូច្នេះកំហុសនៅមានច្រើន។ ការបកប្រែស្វ័យប្រវត្តិវាមិនអាចត្រឹមត្រូវទាំងស្រុងនោះឡើយ មិនថានៅភាសាណាក៏គង់តែមានកំហុស។

ដូច្នេះសូមមេត្តាកុំបណ្ដុះបង្អាប់ ឬតិះដៀលរិះគន់លក្ខណៈអវិជ្ជមានឡើយ សូមមេត្តាប្រើវិធីពីរដែលមានដូចខាងក្រោម ដើម្បីជួយសម្រួលឲ្យ Google Translate អាចធ្វើឲ្យការបកប្រែកាន់តែមានភាពល្អប្រសើរឡើងវិញ។

១. ការបកប្រែបន្ថែម (Alternative Translations)៖

Google Translate នឹងធ្វើការសិក្សាស្វែងយល់អំពីការបកប្រែរបស់យើងដែលបានធ្វើក្រៅបន្ថែមនេះ ដើម្បីអភិវឌ្ឍការបកប្រែពាក្យ ឃ្លា អត្ថបទបានល្អជាងមុន។

ប្លក់ក្មេងស្រែ៖ http://khm3ngsr3.wordpress.com/2013/04/19/let-improve-our-translator/

២. ការវាយតម្លៃ៖ http://ow.ly/i/1Vn1r (ដោយ៖ ពពក)

ដូច្នេះខ្ញុំសង្ឃឹមថាយើងនឹងចូលរួមទាំងអស់គ្នាដើម្បីឲ្យការបកប្រែកាន់តែប្រសើរឡើងសម្រាប់ពេលអនាគតនេះ។

ជយោ! ភាសាខ្មែរមានក្នុងកម្មវិធី Google Translate ហើយ

ទេព សុវិចិត្រ — Fri, 19 Apr 2013 01:27:26 +0000

ព័ត៌មានចេញកាលពីខែមុននៅតាមបណ្ដាសារព័ត៌មាននានាបានបញ្ជាក់ថា ភាសាខ្មែរនឹងមានក្នុងកម្មវិធីបកប្រែ Google Translate នៅក្នុងឆ្នាំនេះ។ ព័ត៌មានមួយនេះធ្វើឲ្យខ្ញុំមិនអស់ចិត្តសោះ នៅតែចង់ដឹងចង់ឃើញពីដំណើរការធ្វើនិងការចេញផ្សាយ។

តែនៅពេលនេះការរង់ចាំរបស់យើងទាំងអស់គ្នាបានចេញជាលទ្ធផលហើយ គឺនៅពេលនេះ Google Translate បានបញ្ចូលភាសាខ្មែរទៅក្នុងកម្មវិធីរបស់គេហើយ ក៏ប៉ុន្តែស្ថិតនៅក្នុងកំណែ Alpha ដំបូងប៉ុណ្ណោះ គឺការបកប្រែមិនទាន់ត្រឹមត្រូវច្រើនឡើយ ក៏ប៉ុន្តែយើងក៏អាចចូលរួមឲ្យការបកប្រែនេះល្អថែមទៀតដែរ ដោយធ្វើការវាយតម្លៃទៅលើការបកប្រែនិមួយៗ។

វាពិតជាមានមោទនភាពណាស់សម្រាប់ភាសាជាតិរបស់យើង ដែលនៅពេលនេះកំពុងបង្ហាញមុខជាអន្តរជាតិ។ គ្រាន់តែខ្ញុំដឹងពីដំណឹងនេះភ្លាម ខ្ញុំសែនសប្បាយចិត្តណាស់ ព្រោះខ្ញុំក៏ដូចអ្នកទាំងអស់គ្នាបានរង់ចាំអស់រយៈពេលយូរឆ្នាំមកហើយ។

ព័ត៌មានបន្ថែម៖

--ប្លក់ផ្លូវការរបស់ Google Translate ៖ ហេតុផលពីរដែលលំបាកនៅក្នុងដំណើរការបកប្រែភាសាខ្មែរគឺ

ភាសាខ្មែរនៅលើអ៊ីនធឺណិតនៅមានតិច (ដូច្នេះយើងគួរនាំគ្នាសរសេរភាសាខ្មែរឲ្យច្រើន)
ការសរសេរពាក្យជាទូទៅមិនត្រូវបានប្រើដកឃ្លា (ព្រោះភាសាខ្មែរយើងសរសេរជាប់ៗគ្នា មិនមែនដកឃ្លាគ្រប់ពាក្យដូចអង់គ្លេសនោះឡើយ)

Google នឹងព្យាយាមធ្វើឲ្យភាសាខ្មែរកាន់តែប្រសើរឡើងនៅពេលខាងមុខ។ ម្យ៉ាងវិញទៀតក្បួនដោះស្រាយ (បកប្រែពាក្យ វេយ្យាករណ៍ ការរៀបចំពាក្យ) នឹងមានភាពប្រសើរនៅពេលដែល Google រកឃើញការបកប្រែនិងសិក្សាអំពីការបកប្រែបន្ថែម (alternative translations) របស់អ្នក។

បង្កើតម៉ឺនុយធ្លាក់ដោយប្រើ CSS3

ទេព សុវិចិត្រ — Tue, 16 Apr 2013 04:15:18 +0000

ការបង្កើតម៉ឺនុយធ្លាក់ (Dropdown Menu) អាចធ្វើបានតាមវិធីផ្សេងៗពីគ្នាដូចជាការប្រើ JavaScript និង CSS3 ជាដើម។ នៅក្នុងវីដេអូខាងក្រោមនេះមានរយៈពេល៤០នាទី ដែលរៀបចំដោយ Christian មកពី 1stwebdesigner ដោយមានលម្អិតទៅលើចំណុចនិមួយៗ។ សម្រាប់អ្នកចង់ចេះ ឬក៏ទើបចាប់ផ្ដើមរៀនបង្កើតវែបសាយ អ្នកអាចវីដេអូនេះទុកជាមេរៀនបាន។

តើគួរបង្កើតគេហទំព័រដោយប្រើ Responsive Layout ដែរឬទេ?

ទេព សុវិចិត្រ — Fri, 12 Apr 2013 16:14:34 +0000

ក្នុងរយៈពេលប៉ុន្មានឆ្នាំកន្លងមកនេះ ការប្រើប្រាស់ទ្រង់ទ្រាយ Responsive ក្នុងការរចនាគេហទំព័រមានការរីកសុះសាយយ៉ាងលឿនជាទីបំផុត។ បច្ចេកវិទ្យាចេះតែទំនើបពីមួយថ្ងៃទៅមួយថ្ងៃ ដូច្នេះយើងក៏ត្រូវតាមឲ្យទាន់វាដែរ។

Responsive គឺជាប្រភេទទ្រង់ទ្រាយដែលគ្រប់គ្រងលើទំហំអេក្រង់នៃឧបករណ៍និមួយៗ មានន័យថាពេលដែលបើកគេហទំព័រក្នុងទូរស័ព្ទ, កុំព្យូទ័របន្ទះ, កុំព្យូទ័រ… វានឹងពង្រីកបង្រួមទ្រង់ទ្រាយគេហទំព័រឲ្យសមទៅនឹងទំហំអេក្រង់នៃឧបករណ៍ទាំងនោះ ដោយមិនចាំបាច់ត្រូវមានអ្វីជាជំនួយបន្ថែមទៀតឡើយ។ វាអាចធ្វើទៅបានតាមរយៈ CSS ដោយប្រើលក្ខណៈថ្មីមួយគឺ @media query ។

ប្រភព៖ http://artequalswork.com

កាលពីមុន ដើម្បីបង្កើតទំព័រសម្រាប់ទូរស័ព្ទគេនិយមបង្កើតនូវ sub domain ថ្មីមួយបន្ទាប់មកសរសេរកូដថ្មីឬរចនារូបរាងថ្មីរបស់វា ដែលការធ្វើបែបនេះអាចនឹងចំណាយពេលច្រើន។ ក៏ប៉ុន្តែចំពោះការប្រើ Responsive នេះវិញ គឺវាជួយឲ្យទ្រង់ទ្រាយវែបសាយយើងផ្លាស់ប្ដូរទៅតាមទំហំនៃឧបករណ៍និមួយៗបានយ៉ាងល្អ។

ការបង្កើតគេហទំព័រប្រើទ្រង់ទ្រាយ Responsive មានពីរជម្រើសដែលអ្នកគួរពិចារណា៖

សរសេរ CSS ដោយខ្លួនឯង
ប្រើ CSS Framework

កាលពីពេលមុននោះខ្ញុំធ្លាប់បានសរសេរអត្ថបទមួយទាក់ទងនឹង CSS Framework តែពេលនេះខ្ញុំសុំបង្ហាញម្ដងទៀត តែលើកយកតែ Framework ដែលមានលក្ខណៈ Responsive តែប៉ុណ្ណោះ ដែលមានរាយឈ្មោះនៅខាងក្រោមនេះ៖

ហើយនៅមានជាច្រើនថែមទៀត ដែលអ្នកអាចស្វែងរកបាននៅក្នុងអ៊ីនធឺណិត ប៉ុន្តែត្រូវចងចាំថា framework ទាំងអស់សុទ្ធតែមិនមែនដូចគ្នានោះទេ ដូច្នេះហើយលក្ខណៈពិសេសរបស់វាក៏ខុសគ្នាដែរ ដោយហេតុនេះហើយ framework ខ្លះពិតជាមិនអាចបំពេញតម្រូវការរបស់អ្នកឡើយ ដូច្នេះចូរសិក្សាស្រាវជ្រាវពីវា មុននឹងយកទៅអនុវត្តលើគម្រោងរបស់អ្នក។

Google Reader នឹងត្រូវបិទនៅខែកក្កដាខាងមុខនេះ

ទេព សុវិចិត្រ — Thu, 14 Mar 2013 13:32:15 +0000

Google Reader គឺជាសេវាកម្មមួយរបស់ Google ផ្ដល់ភាពងាយស្រួលដល់អ្នកប្រើប្រាស់ទាំងឡាយ ក្នុងការតាមដានព័ត៌មានពីគេហទំព័រនានា (RSS Feed reader) ។ ក៏ប៉ុន្តែកាលពីម្សិលមិញនេះ Google បានចេញសេចក្ដីប្រកាសក្នុងដំណើរប្រតិបត្តិការណ៍ Spring of Cleaning លើកទី២ ដែលត្រូវធ្វើឡើងក្នុងគោលបំណងដកចេញនូវសេវាកម្មមួយចំនួន ហើយក្នុងនោះក៏មានរាប់បញ្ចូលទាំង Google Reader ផងដែរ។

សេវាកម្មមួយនេះនឹងត្រូវបិទជាស្ថាបពរនៅថ្ងៃទី១ ខែកក្កដា ឆ្នាំ២០១៣ គឺនៅសល់រយៈពេលប្រហែល៣ខែទៀតតែប៉ុណ្ណោះ។ Google ក៏បានអនុញ្ញាតឲ្យអ្នកប្រើប្រាស់ អាចយកទិន្នន័យរបស់ខ្លួនចេញពី Google Reader តាមរយៈ Google Takeout ។

គួរបញ្ជាក់ផងដែរថា Google Reader ត្រូវបានចាប់ផ្ដើមដំណើរការដំបូងនៅក្នុងឆ្នាំ២០០៥។

CSS Framework ចំនួន៥សម្រាប់ការរចនាគេហទំព័រ

ទេព សុវិចិត្រ — Tue, 05 Mar 2013 13:14:59 +0000

ក្នុងពេលបច្ចុប្បន្ននេះការប្រើប្រាស់ Framework កំពុងតែទទួលការពេញនិយម ដោយហេតុតែវាជម្រុញឲ្យការអភិវឌ្ឍកម្មវិធីមានភាពលឿនរហ័សជាងរាល់ដង។ CSS ដែលជាកូដសម្រាប់រចនាទៅលើផ្ទៃទំព័រគេហទំព័រក៏ត្រូវគេបង្កើតឲ្យមានជា Framework ផងដែរ ដែលជួយសម្រួលដល់អ្នករចនាគេហទំព័រឲ្យកាន់តែមានភាពងាយស្រួលក្នុងការងាររចនារបស់ខ្លួន ទាំងទ្រង់ទ្រាយ ទំហំ គម្លាតនិងផ្សេងៗទៀត។ ថ្ងៃនេះខ្ញុំសុំបង្ហាញនូវ framework ចំនួន៥ដែលផ្ដល់ភាពងាយស្រួលព្រមទាំងប្រកបទៅដោយលក្ខណៈសំបូរបែប។

១. Twitter Bootstrap

Twitter បានបង្កើតគម្រោងបើកទូលាយមួយមានឈ្មោះថា Bootstrap ។ នៅក្នុង Bootstrap ផ្ដល់ឲ្យអ្នកនូវលក្ខណៈពិសេសដូចជាស្ទីលរបស់ប៊ូតុង បែបបទ មឺនុយ តារាង ទ្រង់ទ្រាយទំព័រ (Grid, Responsive និង Fluid) និងផ្សេងៗជាច្រើនទៀត ដែលជួយឲ្យការរចនាមានភាពលឿនរហ័ស។ បច្ចុប្បន្ននេះ Twitter Bootstrap ទទួលបានការពេញនិយមយ៉ាងច្រើន។

២. Foundation

Foundation ត្រូវបានបង្កើតឡើងដោយ Zurb ហើយវាក៏មិនខុសអំពី Twitter Bootstrap ប៉ុន្មានដែរ គឺទាំងពីរនេះមានលក្ខណៈពិសេសប្រហាក់ប្រហែលគ្នាដូចដែលមានរ៉ាយរ៉ាប់ក្នុងផ្នែក Bootstrap ។ ក៏ប៉ុន្តែចំណុចពីរដែលគួរលើកឡើងនៅពេលនេះគឺ UI របស់ Bootstrap មានលក្ខណៈស្រស់ស្អាតជាង Foundation ក៏ប៉ុន្តែ Foundation មានការរៀបចំទ្រង់ទ្រាយទំព័រ Responsive Grid ប្រសើរជាង។

៣. Gumby Framework

ចំណែកឯ Gumby មួយនេះវិញក៏មិនខុសពីពីរខាងលើនេះដែរ វាមាន UI ស្រស់ស្អាតហើយក៏មានលក្ខណៈងាយស្រួលផងដែរ។ នាពេលថ្មីៗនេះ Gumby ទើបតែចេញជំនាន់ទី២ ដែលជាជំនាន់ថ្មីរបស់ខ្លួន។

៤. 960 Grid System

ខុសប្លែកពី framework បីខាងលើ, 960 Grid System ពុំមានការរចនា UI អ្វីនោះឡើយ ប៉ុន្តែវាផ្ដល់នូវការរៀបចំទ្រង់ទ្រាយគេហទំព័របានយ៉ាងល្អប្រសើរដោយមានកាត់ជាប្រឡោះៗបានយ៉ាងល្អ។ ម្យ៉ាងវិញទៀតនោះប្រសិនបើអ្នកទាញយកកញ្ចប់ framework នេះ អ្នកនឹងទទួលបានរបស់សំខាន់ៗជាច្រើនថែមទៀត ដូចជាពុម្ពគំរូ (template) សម្រាប់រចនាគេហទំព័រក្នុងកម្មវិធីផ្សេងៗដូចជា Photoshop, Illustrator, Inkscape, Gimp … ។

៥. Unsemantic

Unsemantic ក៏ដូចទៅនឹង 960 ។ Unsemantic និង 960 ត្រូវបានបង្កើតឡើងដោយម្ចាស់តែមួយ គឺលោក Nathan Smith។

តើអ្នកកំពុងប្រើ framework មួយណា? ហើយតើអ្នកមាន Framework ណាផ្សេងទៀតដែលចង់ប្រាប់មកខ្ញុំវិញដែរទេ?

IT4U | បច្ចេក​ព័ត៌មានវិទ្យា​សម្រាប់​អ្នក

ឯកសារ​បន្តិច​បន្តួច​អំពី​ការ​បង្កើត​ពុម្ព​អក្សរ​យូនីកូដ​ខ្មែរ

ផែន​ទី Google ថ្មី

ការ​រចនា​ទ្រង់​ទ្រាយ​ថ្មី

កាត​ព័ត៌មាន (Info Card)

លក្ខណៈ​ថ្មីៗ​ដទៃ​ទៀត

តើ​អ្នក​ចង់​ប្រើផែន​ទី Google ថ្មី​នេះ​ដែរ​ឬទេ?

វីដេអូ​ព័ត៌មាន​អំពីផែន​ទី Google ថ្មី

ពុម្ព​អក្សរ​ខ្មែរ​ឈ្មោះ «បឹង»

Ubuntu 13.04 ដាក់​ឲ្យ​ទាញ​យក​ហើយ

រួម​គ្នា​ជួយ​ឲ្យ Google Translate ភាសា​ខ្មែរ​ប្រសើរ​ឡើង

ជយោ! ភាសា​ខ្មែរ​មាន​ក្នុង​កម្មវិធី Google Translate ហើយ

បង្កើត​ម៉ឺនុយ​ធ្លាក់​ដោយ​ប្រើ CSS3

តើ​គួរ​បង្កើត​គេហទំព័រ​ដោយ​ប្រើ Responsive Layout ដែរឬទេ?

Google Reader នឹង​ត្រូវ​បិទ​នៅ​ខែ​កក្កដា​ខាង​មុខ​នេះ

CSS Framework ចំនួន៥​សម្រាប់​ការ​រចនា​គេហទំព័រ